عمرو عبد الحق يكتب : حرز حرز يا عم الحاج

حرز حرز يا عم الحاج
·      ما احلى احرازك يا داخلية .. تخيلوا معى ماذا كانت احراز الداخلية فى قضية التظاهر امام منزل وزير الداخلية المتأخون 16 قطعة غيار داخلى حريمى + 6 قطع غيار داخلى رجالى مقاسات مختلفة من سمول الى إكس لارج .. ويا ترى رفعتو البصمات من على الاحراز ولا استسهلتوا ورفعتوا صاحب البصمة من بابه .. ارجو نقل المحاكمات الى كارفور .
·      اقليم قناة السويس مباح للاجناب بحق الانتفاع ... اين نساء مصر .. الامل معقود عليكم الان لان للاسف رجالتنا مشغولين باحراز الداخلية للملابس الداخلية اللى اتمسكت امام منزل وزير الداخلية .
·      بونات وكوبونات للاكل والبنزين وياسلام لو الواحد حب ياكل اكتر من اللى مكتوب على البون واتمسك تلبس بحرز فيه رغيفين زيادة اعتقد الداخلية هتقبض عليه فوراً تنفيذاً للقانون والدستور بتاع العجلة تدور والنيابة كالعادة هتأمر بأربع ايام مش حبس لا سمح الله وانما اربعة ايام يشترى عيشه من فرن فينوس .
·      تم القبض على عامل دليفرى ( طيار ) امام محكمة التجمع الخامس وكان حرزه نص كيلو سبيط غير مدرج بالاوردر وكان عقابه سريع فخد خمس سنوات وستة اشهر حبس .. والخمس سنين علشان السبيط والستة اشهر علشان نسى الطحينة..... والله العظيم اتقبض عليه بجد واتحكم عليه بجد .. مش مصدقين .... ليكوا حق ما الحرز اتاكل خلاص .
·      تحت عنوان اخلع يا افندم .. رأينا كلنا وزير الرياضة المتباهى بانجازاته الوهمية وهو بيخلع بأمر من الحارس الخاص له وبمنتهى الغطرسة خلع الوزير وجرى زى ما رئيس الوزارة جرى فى مستشفى البدرشين عقب حادث القطار ... وطبعاً وزير الرياضة وهو رياضى طلع يجرى لحد طريق مصر الاسماعيلية الصحراوى وتوقعنا كلنا بعد هذه الفضيحة وخصوصاً ان التراس زملكاوى " وايت نايتس " حرزوا اللاب توب بتاعه .. ماذا توقعنا ؟ ... توقعنا بيان من الوزير الهارب ينتهى باستقالة حفظ ماء الوجه ... ولكن فوجئنا بالوزير على الفضائيات بالساعات يتحدى بلا اى حياء وعلى الرغم من نبرة الحزن لفقدانه اعز ما يملك وهو اللاب توب بتاعه الا انه كان بيضحك زينا ... طب احنا بنضحك عليك انت بقى بتضحك على ايه " اكيد شفت فيديو خلعانك على اليوتيوب " وعلى فكرة عندك حاجه من اتنين .. لتقدم استقالتك او تكمل مدتك جرى والجدع يحصلك وخصوصاً انك عامل خطتك الرياضية حتى عام 2020 يعنى علشان تنفذها هيكون اتقطع نفسك .. عموماً استمرارك فى الوزارة يرسخ مبدأ اذا لم تستحى فاخلع ما شئت ونصيحة اقدمها لك لو حبيت تعمل مؤتمر صحفى تانى ما تروحش لوحدك ابقى خد باباك معاك .